Mehr zum Thema Literatur Allgemein Testbericht

Ich habe vor einigen Wochen eine Kurzgeschichte in bayrischer Mundart geschrieben, die ich euch jetzt gerne vorstellen möchte. Der Titel der Geschichte lautet "I D'LOLA!", was auf Hochdeutsch "Ich, die Lola!" bedeutet.
Auf die Idee, die Geschichte zu schreiben brachte mich mein eigener Hund, der auch Lola heißt. Bei Lola handelt es sich um einen eigenwilligen und manchmal ziemlich störrischen Basset (Das ist eine Hunderasse; Tiere dieser Rasse haben extrem lange Ohren, die bis auf den Boden hängen sowie kurze nach außen "verdrehte" Beine und einen langen, dicken Bauch).

Ich wünsche euch nun viel Spaß bei meiner ersten Kurzgeschichte!



I D'LOLA!
°*°*°*°*°
...aus’ m Lem von am boarischen Hund
*°*°*°*°*°*°*°*°*°*°*°*°*°*°*°


Ois ersts muas i mi ja moi vorstäin. I bin a original bayrischer Bässet und oanahoib Joar oid. Bässet san de Hund mit dene ganz langa Oan und dem langa dicken Badi. D' Leid findn des immer so lustig, wenn i ma auf meine Oan drauflatsch oder wenns beim Saufa in Napf neihängan. I persenli find des ned so guad...
In der folgendn Gschicht mächt I eich a bissl aus meim aufregndn Hundeoidog verzäin. Wos hoid an ganzen langa Dog so an mehr oder weniger wichtige Ereignisse bassiert. I wünsch eich vui Spaß!

Oiso da ganze Schdress gäd ja scho in der Fria o, wenn um achde der dabbige Briafdräger kummt. A Schdress is des oiwei! Jeden Dog muas i scho so fria aufsteh, um dem dabbign Bostbodn endli a moi klar zum macha, dass er in meim Revier nix zum suacha hod. Doch er verstäds einfach ned, do ko ma so vui bäin wia ma mog. Jedn Dog kummt a wieda und gäd erst dannad, wenn a de scheiß Brief eigworfa hod, de mei Herrle eh ned braucht. Jedn Dog des gleiche! I kon an mit de schlimmstn Schimpfwerta beleidign, doch er schaugt ned a moi noch mia. Wenn i vielleicht ah ned der gräßte unter meine Artgnossen bin, bain kon I trotzdem. Aber warscheinli verstäd a mi ned a moi, oda er duad zmindest so. Gestern zum Beischbui is a wieda kumma.
Da fard a ganz frech mit seim Radl oafach in mei Revier ohne zum Frogn. I moan er kanntad ja wenigstens frogn, oda? Vielleicht derferd er ja dann a moi seine blädn Briaf eiwerfa. Aber wia gsogt, er radelt oafach so in unsern Hof. I spring natürli sofort aus meiner Hüttn raus und leg an Fuchzgmätaschbrint quer durch unsan Vorgarten hi. D' ganze Zeit bäi I wia bläd, doch wia imma reagiert a gor ned drauf, der Depp der dammische! Dann bin i endli bei unserm Zaun okemma und er städ immer no ganz gmiatli vor unserm Briafkastn. Der bläde Zaun wenn do jetzad ned im Weg war, dann dad i den Saugribbe so vo seim Radl runtaschmeißn, des ko i eich sogn! Endli hod a seine Briaf in Briafkastn neigsteggt, doch er fahrt immer no ned. Oiso wirkli unmegli is des heitzdog. Koa Reschbekt mehr vor de Hund! Wenn i nua a bissl gräßer war, dannad war des ja scho wieda was andas. Aber ois Hund hod ma ja a a schwers Lebn. Zeit is woarn, endli fahd a wieda, der Kasperl der. Und jetzad stäids eich a moi vor: Des gäd jedn Dog so! Des dad eich doch genauso aufregn wia mi! Gebt’ s es nua zua! I kenn eich doch! Wias jetzad scho a bissl gsägn habts is des a ganz schener Schdress in so am Hundelebn. An ganzn Dog muas ma sie ärgan!

Und dannad gähd des ganze Ärgernis scho wieda weida. Nach dem ganzn Aufregn häd ma vielleicht moi Hunga, aber na, de arma Hund ham ja Zeit. Erst a moi gmiatli um neine aufsteh, dann no friastückn und dannad vielleicht amoi, nachdem i scho wieder a
hoibe Stund bäin hab miassn, mir mei woiverdiends Fressn bringa. A Schdress is des! Und wenn dannad ah no d’ Kinda dahoim san, dann is des a bsonderer Schdress, wei ma dann ned amoi in rua fressn ko. Dann lachas nämli d' ganze Zeit, wenn meine dabbign, vui z' lang grotna Oan in mein Fressnapf foin.
Wos kon a I dafür? I bin doch nur a arma boarischer Hund! Und wenn’ s a moi ned lachan, dannad woin’ s mi streicheln oder mit mia spuin. Noch der ganzn Aufregung beim Fressn mechad ma dann vielleicht no moi a bissl schlaffa. Aber wos do scho wieda ois dazwischen kummt, verzäi i eich a anders moi.

Oiso bis boid,

eier Lola



Ich hoffe, dass euch die Geschichte gefallen hat. Schribt mir doch bitte, was ihr davon haltet!


__________
Die Kurzgeschichte ist Copyright © by Fabian Karg