Über Themen mit K Testbericht

Wieda amoil is a so weid, imma die boa letzten Tog vom Monat is einfoch ka Geld mehr im Briaftaschl. Sicha is eich a scho so gonga, und do is guata Rat oft teier. Do muis ma donn scho schaun, daß ma holt nu wos zum essen kriagt. Wos dad ma do oft mochn, wenns ned a guade Einrichtung gebn tad, bei uns in Linz.

As Vincenc Stüberl, so nennt sie des. G’führt wird des von de Barmherzign Schwestern, die a a Kronknhaus hab’n. Gonz in da Näh von mir, grod a poor hundat Meta weita von meina Haustir.Und genau do geh i donn hie, wenns wieda amoi zwickt und kneift im Goidbörsl.

Eini därf do a jeda, der ned vui verdina turt. So san do Orbatslose, Sozialhülfeempfänger oda a de, de wos ka Doch üban Kopf hab’n tan. Einfoch Olle, de holt grod amoi a poor hundat Euro im Monat in da Toschn hab’n. Eini kummt ma do von 13.00 bis 17.00 Uhr, wobei ma oba uma 16:30 a wos zum mit Ham nehma kriagt. Und genau des moch i dann. Weil ehrli’ gsogt, mog i des net unbedingt, wenn i die gonzn o’gsoffnen Leit siag, die hoit do a san. Do schmeckts ma jo donn nimma.

Um grod amoi 40 Cent kriag i donn a echt guats Essn. Des kummt nämli oiba von da Kuchi, de, de wos a führs Kronknhaus kochen. Do gibt’s dann ois, wos ma si so vorstell’n ko’. Eben genau des, wos im Kronknhaus a gibt. Fleisch, Spaghetti oda a Pizza genauso wia Kuchen und Pudding. Und ois was hoit sonst nu so gibt. Imma frisch, des, wos im Kronknhaus übri’ bleibt.

Donn daham tui i des Essn donn auf an Tella, steh den donn in die Mikrowölln und wort hoit bis worm is. Ob und zua moch i ma donn a guats Bier dazua auf und loss mas so richti schmecka.

Oba net nur a worms Essn kriagt ma do. De, de auf da Strossn leben kännan do erna Wäsch woschen, sie selba a und des ois gratis, hoilt a guade Tat am Mitmenschen, wia die Nonnen do sogn.

Zum finden is die Ausspeisung, die innen a gonz schee is in da Seilerstätte in Linz. Am besten, und des dan die Meisten, weil sie de äh koa Auto net leisten kännen mit die Rappen vom Schuasta, am Radl oda mit da Bim. Von da Hoatestell Mozartkreizung sands donn grod amoil a poar Schrit bis zum wormen Raum, wo des ois aboten wird.

Es is hoit guat, dass a no soiche Leid gibt.

Oise, wenns Göld amoi wieda zweng wird, donn dats jetzt net nur, nochdems des jetzt wascheinli longson glesen hobts bewerten und kommentieren, sondern kummts hoit a amoi hie.

Ad rem

Euer Jörg

© by Jozeil 12/2002